政府以環保為由，再次硬銷停車熄匙方案，未實行先死人，大家人心惶惶喊驚變焗燒豬，倒不如搵定降溫法寶自救。網上流傳方法唔算多，究竟火酒勁定係玩冰醒，即刻測試話你知！唔想花錢買汽車降溫用品唔緊要，因為一支冰凍鹽水至係各位司機哥哥的救命劑。
記者：許維雅
攝影：陳盛臣
Model：Sukmi
鳴謝：關嘉美醫生
降溫法一：火酒噴霧
準備
水壺$10（c）
消毒火酒$9
（一般藥房有售）
方法
網上流傳以1：10的比例將消毒火酒加水稀釋，放入噴壺向車內櫳四周噴射，火酒揮發時會帶走空氣中的熱力，加快車廂降溫。
結果
溫度確由45℃降至34℃，但需時15分鐘才可降至這效果，還要持續不停噴才有效。
記者意見：感覺只是噴霧的水點灑上身才有降溫作用。
醫生意見：消毒火酒是易燃液體，我不主張在多機械零件的汽車內使用，有一定危險。若政府固執強行實施停車熄匙政策，會焗死職業司機，我認為5至9月應豁免。
降溫法二：迷你冰桶
準備
Coleman8.5L保冷冰箱$189（b）
iThermo超極冰雪種$70（b）
冰$13/包（便利店有售）
方法
內地網上新聞曾報道，上海地鐵因空調不足而放個大冰桶在車廂內降溫，大部份乘客都話有好過無，其實倫敦地鐵亦曾用此法。
結果
車廂溫度下跌速度極慢，只微降至36℃，可能用冰磚效果更佳。
記者意見：與其慢慢等，我同攝影師都忍不住攞起冰敷面降溫。
醫生意見：中暑好似發燒，冰當然有助降低體溫，但這個方法都不持久，轉頭溶晒啦！
降溫必備四寶
中暑的成因主要是體溫過熱、缺水或空氣不流通所引致，困在超過40℃車廂，要中暑真是話咁易，最弊在汽車用品店所提供的降溫產品幾乎是零。司機要預防中暑，提你準備以下熄匙防暑四寶。
冰鹽水或電解質飲品
出汗太多，鹽份同時流失，多飲水之餘，亦要飲電解質飲品補充鈉等礦物質，關嘉美醫生建議可用鹽水，「500cc水加1茶匙鹽搖勻後雪至冰，第二日慢慢飲，預防中暑好有效，又夠經濟。」
冷凍啫喱退熱
一般冷凍啫喱產品都有一定降溫作用，又不怕好似玩冰整到全身濕，款式有凍枕頭及凍肩帶，之前一晚雪凍，第二日放在車以備不時之需。懶人怕麻煩的話，買定盒退熱貼啦！
風扇仔助空氣流通
保持空氣流通是重要一環，汽車風扇要插電，買把MYCARR太陽能抽氣扇頂住先。
坐得凉浸浸
坐車PatPat最受苦，不妨加個散熱快及透氣度高的Coolmax物料坐墊，雖無即時冷凍效用，但長放座椅上都有助降溫。
店舖：
（a）偉良汽車配件中心（23842464）
（b）city'super（25062888）
（c）JUSCO$10店（28921812）
