港股噚日食住花旗股市嘅升勢造好，不過交投只係一般，成交得543億，恒指波幅亦好窄，日線圖現十字星，係待變格局。
內地股市造好，滬深300指數再升1.1%，令股民嘅情緒略為好轉，不過指數已經升到阻力位，短炒都係吼強勢股較安全。內銀股同內房股繼續有追捧，以後者走勢較強，多隻股份都出現技術突破，炒上空間仍吸引。
越地C輪22816：越秀地產（123）報收1.90元，升3.8%。股價喺1.60至1.80元區域已經徘徊咗好耐，上禮拜五現黃金交叉，噚日突破100日同250日線，連續兩日大成交，好大機會升穿2元關推向2.27元，破埋就睇2.50元，可以諗吓隻C輪22816。
隻輪現價49.5仙，2011年1月28日到期，行使價1.85元，溢價23.4%，引伸波幅87.6%，有效槓桿率2.5倍，正股升上2.50元，22816睇92.8仙，有87%上升空間，正股跌穿1.73元就沽咗隻輪。
俊樺