大陸有「秋菊打官司」，我哋香港就有「周菊打官司」！單case係咁，有個大凌（211）嘅內地小股東周本菊（圖），狀告港交所（388）上市科總監陳肇鈞，告咩呢？阿菊大呻自己黑仔，03年第一次買港股，就買中咗隻停牌停足6年仲停到家嘅大凌。佢之後唔敢再玩港股，但條氣又唔順，咪告上小額錢債審裁處，告陳生錯誤行使停牌機制，導致佢買咗8、9萬蚊嘅大凌股份唔可以套現，仲要求陳生賠錢㖭！但個官要求阿菊講清楚何謂停牌機制，然後陳生點樣錯誤行使停牌機制，仲要求阿菊尋求專業意見，證明陳生係咪錯誤行使，睇怕阿菊要額外使多筆錢咯。
李華華