世界盃決賽全民捱眼瞓，上任唔夠兩個禮拜嘅中大校長沈祖堯，噚日凌晨亦同八百幾個師生、校友喺校園百萬大道露天睇波。但沈校一時捧荷蘭，一時撐西班牙，又話其實係支持中大，估唔到佢連睇波，都要「中立」。
為咗同班師生校友一齊睇波，沈校瞓得三粒鐘就起身，凌晨兩點三着住件橙色波衫到場，仲好風騷咁指住件衫，話贏波後就開香檳慶祝，但當司儀話咁即刻荷蘭粉絲啦時，佢又話件衫其實係中大足球隊，佢係「捧中大」喎。
不過，賽事期間西班牙攻門失手，沈校又好肉緊咁抱頭高叫，最後西班牙終於贏咗，佢又開心到攞支香檳嚟噴，真係好貫徹中大嘅「中立」原則囉。其實沈校今次搞睇波活動，趁機同師生、校友搞好關係，就知佢係公關高手啦。
好似市民陳先生咁，雖然唔係中大校友，仔女又唔係中大學生，但佢噚日就同老婆專程由將軍澳入中大，話因為中大最近有唔少風波，所以嚟撐沈校長喎。讀中大三年級嘅Jimmy就話，中大呢排是非多，趁世界盃開心吓都係好事，不過佢講明唔會因為今次活動，就淡化咗民主女神像事件，因為9月開學學生會將會舉行投票，佢估計到時大家嘅討論又會熱烈番。
幫跌甩骱男生包紮
除咗沈校與眾同樂，同場仲加映學者講波，請嚟蔡子強、馬嶽同呂大樂評述。蔡子強話德國出局搞到佢冇乜心機，但佢捧開巴塞，所以轉為支持西班牙。馬嶽就話荷蘭會贏，可惜最後佢押錯注。至於意大利忠實粉絲嘅呂大樂喺開波前就話，如果荷蘭肯進攻就會贏。咦，黃興桂上身喎。
五點左右臨天光，沈校睇到完場就走人，冇睇埋西班牙捧盃。但之後有位物理系男生唔小心跌倒，左手甩骱，原本走咗嘅沈校長收call即刻返轉頭，借咗條頸巾出嚟當三角巾，幫學生固定左手，仲陪個男生上白車，好彩後尾個男生冇乜大礙。
mailto:[email protected]
