細細個足足有成200磅嘅鄭欣宜，經過多年努力終於瘦身成功，近日仲有傳話佢家只有120磅，創出佢個人新低磅數。噚日欣宜同呂慧儀去荷里活廣場出席活動，問到欣宜家係咪只有120磅？佢話：「家係我最弗嘅時候，但佢哋估低咗真實磅數。家未到自己目標，想瘦多十幾磅，想個身瘦啲。」雖然瘦身成功，但欣宜未有打算影寫真，佢話未可以衝破心理障礙着三點式泳衣。
簽約同肥姐交代
噚日係欣宜媽咪沈殿霞（肥姐）嘅農曆生忌，不過欣宜朝早未有隨經理人陳淑芬到寶福山拜祭，佢解釋：「自細冇乜拜山，我選擇做完嘢返屋企靜靜紀念，喺心中同佢講，生日快樂，放心！ILoveYou。」當欣宜知陳淑芬帶咗佢日前着婚紗簽約唱片公司嘅相片拜祭，欣宜話：「Sosweet，希望媽咪見到我着婚紗。」
陳淑芬則一早到寶福山拜祭肥姐、張國榮同羅文，佢為亡友準備祭品衣紙仲有鮑參翅肚、香煙名酒同埋為肥姐生忌而做嘅紙製蛋糕同靚衫。上香後陳太攞出一本刊登咗欣宜簽約唱片公司嘅專訪以及當日簽約時欣宜着婚紗嘅相片出嚟，佢話呢啲事當然要向肥姐交代喎！
