《歡樂今宵》雖已落幕多年，藝員羅君左依然笑彈不絕，因細菌感染切去右腿的他，不但「人」叻，「自己」更叻。與病魔惡鬥期間，即使面色如死灰，他仍會對鏡自言：「幾好吖！今日努力啲！」愛吃東坡肉卻要戒肥膩，他說：「搏命食，但係唔好吞，搏命瞓，但係唔好合埋眼。」
十個裏面有一個是奸
笑星的力量不可小覷，調侃別人、嘲諷自己，永遠峯迴路轉，想聽他康復後遇過的感人至深小故事，他卻說輪椅是一面照妖鏡，「照到邊個忠、邊個奸，通常十個裏面九個都係忠，得一個係奸，奸嗰啲，多數係年紀大嘅阿伯」。
到底阿伯有幾奸？「好似搭咁，我喺前面，個阿伯喺後面，原本一開門我就可以入去，但我見大風，咪拉開啲等佢入去先，佢入咗去，跟住㩒閂門。」更匪夷所思的事陸續有來，「我住6樓，想去14樓探朋友，我問個阿伯，呢部係咪去14樓？佢話唔係喎，叫我搭隔籬部去13樓再轉14樓，然後閂門走咗」。
坐輪椅不是傳染病，文明社會遇着怪伯伯，他說心情「冇乜嘢」，「哈，有得畀我講一世喎，我係因為病，冇做錯嘢，又唔係打劫俾警察追跌落嚟跌跛腳，哈哈」。
11年前，他發現患上糖尿病，影響腎功能，每天在家洗腎四次，「唯一無cancer（癌症），其他乜都有，總之入到醫院，科科都關我事，一定收留到我。」
一定收留他的醫院，也成為他截肢的元凶。去年，他因為接受通波仔手術留院，經常赤腳在醫院走動，結果細菌感染，由一隻腳趾到另一隻，由腳掌到小腿，由膝蓋到大腿，糖尿病令他傷口難以癒合，先是截去腳趾，後來是右小腿。
會不會埋怨上天？「大把截肢病人啦，唔只我一個，不過我可能係最快做決定嗰個。」幾耐呢？「分零兩分鐘啦！」記者瞪着眼不可置信。「你覺得耐呀？」「唔係，我以為你會話幾日。」「第一次我決定得好快，反而第二次我諗咗兩日，因為要切埋膝頭，膝頭係好重要嘅關節，如果冇咗膝頭，以後條路好崎嶇。」
截肢後醒來感覺重生
前路是變崎嶇了，不過他也變強了。「醒得番我感覺係『走甩咗』，冇乜感慨冇咗隻腳，我呢種人要全身麻醉，風險好大，隨時猝死、失血過多，返唔到嚟，我兩次都敢博，兩次都博到，所以覺得走甩咗。一個肢體可以換番條命喎，好多計劃都未做喎，應承咗啲慈善機構，排咗好多想做埋佢。」
最困難的時候，他懂得安慰自己，「日日起身對住塊鏡，明明塊面灰晒都話：幾好吖！今日努力啲！卒之吓掂咗喎，其實幾有效。戒口嘅嘢，鍾意食咪照擺落口囉，兩就番出嚟，好似嗰啲好肥膩呀東坡肉嗰啲，自己都覺得過份o架喎，可以搏命食，但係唔好吞」。然後再補一句：「搏命瞓，但係唔好合埋眼。」
這天他51歲生日，心情平靜安穩，撰寫《我走出死蔭的幽谷》分享經驗，下周推出，「要捨棄先有得着，我犧牲少少肢體，得到咁多嘅愛，我好感恩，自從截咗肢之後我每日都笑口常開，以前惶惶不可終日驚個病唔知幾時發，家穩定晒，可以放鬆自己」。
記者 張嘉雯