位於禮頓道與希慎道交界、利舞台對面翠園隔籬，以前有間星巴克，雖然論食物選擇，對面G.O.D.裏面嘅Habitu較多，論私隱度則應該係樓下嘅新寧餐廳。但幾十蚊杯咖啡，賣嘅當然唔只水加咖啡粉，而係大都會情調。
其實上世紀90年代中，星巴克已開展中國業務，仲喺大中華導演一齣三國演義，將香港同廣東代理權授予美心集團，台灣及江浙滬就授予台灣統一集團，北京、天津及華北區則授予風險投資基金創立嘅北京美大咖啡。可能香港舖租貴，論開店速度同經營績效，由台灣統一集團跑出。
星巴克策略係只佔海外投資5%，減低風險兼每月收取專利金。喺內地，星巴克同統一集團旗下嘅統一超商及統一企業，由授權發展至合作，03年增持股權至50%，同年，星巴克喺日本因擴張過急令業績見紅，被迫煞停開店步伐。當一盤生意追求規模而忽略利潤最大化，容易因失衡而自亂陣腳，開得太多就欠獨特個性。
盤數好睇唔好食
華潤創業（291）以3.266億元購入太平洋咖啡80%權益，令05年以2.05億元買入呢盤生意嘅其士泛亞（508）成功套現兼賺近一個開。
話就話以12.1倍EBITDA買返嚟，事實上仲要帶佢入去競爭已經好激烈嘅內地市場，就算利用本身超過2900間連鎖超市網點嘅協同效應，都要預留多幾個億開支。冇華創引路，太平洋咖啡好難打低佈局多年嘅星巴克，人家背後亦係大集團，加上麥當勞近年做埋McCafe，製造價格競爭，對星巴克威脅唔細，所以家吓唔只賣咖啡，仲有自家品牌Via嘅飲品，而太平洋咖啡的確較專注，杯咖啡冇咁甜，舊年跟本地財經媒體合作優惠網上訂戶買一送一，不過買Coupon嘅支出由財經媒體出資，否則盤數點會咁好睇！睇怕呢盤生意到咗華創手上，好睇未必好飲，要畀心機慢慢湊，嫌杯啡齋齋哋，仲要落多啲Cream。
胡孟青
獨立股評人