立法會就快放暑假，瀰漫一片holidaymood（假日氣氛）。譚偉豪噚日主持資訊科技及廣播委員會傾免費電視牌，笑笑口話最後一次開會，就快放假。卿姐即刻狂抦譚偉豪，暗指佢偷懶。
卿姐話諮詢期8月初就完，點都要舉行特別會議，捉三個電視牌申請人嚟立法會交代，唔可以就咁放暑假，「好似季尾收爐喇，主席又話放假喇。我覺得我哋唔可以咁輕率囉。」高達都幫口，話「我知你老哥未放假。世界盃都睇完，你邊有地方去啫？」
譚勢孤力弱，仲唔知死，反對特別會議安排公眾發言，「我諗三個台都好多嘢傾o架喇。」卿姐窒多佢一鑊，「你驚好多人嚟呀主席？」
係囉，譚主席，功能組別犯眾憎，你都係醒定啲好。