熱爆全球嘅世界盃曲終人散，西班牙荷蘭場生死決戰，令全香港唔知幾多萬人噚日烏眉闔睡咁返工，就連新地（016）「樓神」雷霆，第朝要做大show公佈鴨脷洲南灣新盤嘅價單，一樣捱眼瞓睇晒全場波！
唔傾唔知，樓神唔單止對賣樓有心得，講波亦難唔到佢，甚至乎，估波仲勁過俾德荷兩國球迷追殺緊嘅神奇八爪魚保羅先生！
老雷話，佢一早就睇好西班牙。原因？估唔到係為咗一個男人。大家唔使懷疑老雷嘅性取向，佢口中嘅男人只不過係阿仙奴嘅法比加斯啫！老雷原來係「兵工廠」嘅忠實粉絲，成隊最鍾意嘅球員，咪就係效力西班牙國家隊嘅法比仔囉，所以佢一於「愛屋及烏」，鍾意埋西班牙。
老雷仲話，自己都信八爪魚保羅，有買西班牙贏o架，只可惜……西荷大戰90分鐘都只係打和收場，結果……信保羅都要輸錢，雖然佢輸幾多無同華華講，睇怕都係小注怡情個隻嘅！咁家保羅又話俾人追殺又話榮休，華華已經諗定，稍後英超開波、下屆世界盃，會搵老雷叫佢估賽果，信人，點都好過信隻八爪魚啩，你話係咪？
李華華
mailto:[email protected]