特區嘅行政立法關係向來麻麻，過去一年冇乜改善，立法會內務委員會主席劉健儀噚日年結時更話雙方互相投訴個案增加，行政機關成日投訴議員用冒犯性詞語，威嚇要拉隊走人；議員就不滿官員唔出席會議接受質詢。劉健儀話希望雙方互相忍讓，唔好撩交嗌，期待日後議會「揚清激濁」喎。
雖然部份副局長成日唔見人，但劉健儀不點名讚揚個別副局長及政治助理願意走入人群，發揮應有角色。另外，政府今年繼續喺立法會休會前失驚無神提交唔少法案，劉健儀再次提醒政府下次唔該早啲，立法會唔係奉旨幫佢趕工。而23條立法就至少要審兩至三年，換言之現屆政府都好難處理到。