講Model，即時聯想起天橋上的馬詩慧、歐陽妙芝和楊崢，相較時下認不到樣說不出名只靠事業線上位的所謂o靚模，她們高貴有台型代表專業，o靚模o靚模，有個「模」字，絕不代表Model。
記者：林佩婷
攝影：譚盈傑、楊錦文、陳盛臣
鳴謝：銅鑼灣海景酒店（35532898）、GBar（28050629）
楊崢服裝及髮型：Cocktail、FrancoNg@PrivateiIFC
馬詩慧：實現我的志願
數九十年代香港名模，馬詩慧（Janet）當之無愧，她作文寫〈我的志願〉就是當Model，18歲入讀模特兒學校展開天橋生涯，初出道烏龍也不少，「第一個Job係個Hairshow，無錢只得剪髮Coupon，我同髮型師講明唔想剪咁短，點知佢剪到邊長邊短，中間仲染成鮮紅色，搞到頭皮都損埋，最後要畀突錢自己整番好個頭；又記得有次做皮草Show，Dresser唔小心將條裙攝入絲襪頭，搞到成場走光。」做了兩三年大牌子Show後，她跳出框框，隻身往巴黎試鏡，不夠兩星期就接到五六個Job，可惜：「可能當年得18歲，結咗婚習慣依賴人，去到巴黎唔識睇地圖，講法文又溝通唔到，經常錯過Casting，日日返到酒店淨係識去超市買麪包罐頭，覺得好慘係咁喊，出Show前一日忍唔住，搭飛機返香港。」
灌輸錯誤觀念
在Janet心目中，o靚模與真正Model河水不犯井水，傳媒給她們一個「模」字，並不代表o靚模是Model，「靠性感靠青春吸引人唔係錯，不過情況太濫，會畀到其他女仔錯誤觀念，讀唔成書可以靠身材搵食，拍短片扮被人施暴，係唔係有妄想症呀？用呢種方法宣傳真係道德淪亡，」Janet：「仲話想入書展㖭，接受訪問又前言不對後語，係唔係年紀小就可以亂講嘢？做人唔應該單講外表，要靠內涵同知識，事業線可以Sell幾耐？至於男仔，記得上年有個小朋友走去買攬枕，我係佢阿媽一定話佢。」她忠告有心入行者要從正途上堂，不可單靠低胸、比堅尼賺快錢，要學懂尊重自己和別人。
歐陽妙芝：參選提升知名度
歐陽妙芝（Christine）誤打誤撞入天橋路，她本着做暑期工的心態替當年的雜誌《青春》拍攝青春之星，自此當兼職Model，93年簽公司，全家總動員幫手看文件，同期有周汶錡、陳嘉容，當時才正式學行Catwalk。「上十堂後就接到Job，成個過程好似有少少發夢，到實戰經驗多咗，慢慢識得點演活一件衫。」經過一段載浮載沉的日子，她想求變，詢問前輩琦琦意見後，97年參加香港小姐選舉，雖未入三甲但卻帶來意想不到收穫，「選美後知名度大增，即刻打入十大Model之列，工作量大增，以前做Model好簡單，唔似家要上電視做訪問，所以嗰陣無做藝人，只做Model。」
98年，她單身往米蘭自薦，「當時有走開外國Show，我想肯定自己條件得唔得，去米蘭幾間公司自薦，最後有一間簽我，公司問我可唔可以即簽即留低，我未有心理準備，因為當時係當去旅行心態，雖然簽唔成，但被人肯定，我都好開心。」
開學校找接班人
除周秀娜和Angelababy，其他o靚模Christine一概不認得：「名模係捱出嚟嘅，以前要紅好難，家只要肯露就有知名度，太易得到未必珍惜，個個比堅尼，打開報紙就寫乜Cup物Cup，認樣好難認。呢個情況係傳媒同社會風氣吹捧而成，事業線只係Gimmick，似爛Gag，感覺佢哋似陣風，希望唔好再吹落去。」眾多o靚模中，她對周秀娜最有印象，「朋友開內衣店搵過佢做嘢，話佢好專業，佢係咁多o靚模當中最有智慧嘅一個，有自己目標理想，自己都係做人阿媽，如果我個女咁做，我會好擔心。」以前，專業Model最少178cm高，有專業操守，會對件衫負責任，「Model工作係TeamWork，家啲o靚模遲一粒鐘可以當無事，Dresser幫手換衫，佢哋態度好差。」06年，她和星級化妝師Gary合作開化妝模特兒學校，為的就是希望尋找接班人，兼防止女孩子被騙。
楊崢：我把握機會
95年參加EliteModelLook大賽奪冠，大學畢業後到紐約發展三年再回流，楊崢（Vanessa）坦言沒刻意製造機會，只是懂得把握機會：「由接第一個Job開始，行內人已經話我唔似新人，去紐約，全因設計師VivienneTam邀請我行Show，喺當地發展，自自然然就留低搞Visa，簽當時第二大經埋人公司Ford。」其他人費盡心機也未能穩站模特兒界一席，她抱平常心兼不斷自我增值如學法文，令她變成香港名模，「喺香港邊讀書邊做嘢，理所當然；去到紐約，工作最大推動力唔係錢，係同有世界級水準嘅人合作嗰種滿足感同經驗。」
靠性感搶版面
八十前的一眾Model，高高在上有氣質，Vanessa說現在當模特兒的界線變得模糊了：「好似乜人都得，」相比真正Model和o靚模，她有此妙論：「無得比，蘋果同橙點比？每樣嘢都有需求，家情況失控，係因為傳媒渲染，又不幸地有讀者鍾意，關係好似雞同雞蛋，好難去怪邊個。我哋以前做Model，喺香港有知名度後就要去倫敦、巴黎行Show吸收經驗，家會咁做嘅人真係好少。」
她也替o靚模不值：「睇睇雜誌用嘅字眼好似『事業線』，對女性幾侮辱，至於班o靚模，可能有部份根本唔想賣弄身材，係經理人要求，無奈喺呢個漩渦迷失。佢哋客觀條件未必做到藝人，惟有靠性感搶版面，隨波逐流最後返唔到轉頭。其實，如果佢哋將定位放喺水着，條路會易行啲，家定位唔清晰先搞成咁，我相信新一代o靚模，都唔係個個想賣弄Cup數。」
專業人士評o靚模
觀乎現時對o靚模的評價，似乎彈多過讚，至於和正統Model有密切關係的設計師和形象設計師，也認為不應將兩者比較，亦不介意和o靚模合作。
陳刀：「兩者無得比較，正統Model有氣質，o靚模無咁好身材，但有青春活力，屬於唔同範疇，負面新聞多可以當宣傳，啱用嘅話，我都可能搵o靚模幫手。」
鄧達智：「兩邊工種唔同，以Janet作標準嘅Model，要求高水平，同正常人有距離；o靚模樣子身材靠近正常人，宅男電車男可以埋身，少壓迫感。我對o靚模無乜反感，唔同時代唔同要求，有供有求只係市場需要，啱用我都會用。」
CeliaWong：「青春活潑無乜唔好，可以當預備Model用，有機會照合作，但唔可以同專業去比。我覺得開頭係OK，但家太濫，唔夠5呎5吋又叫o靚模，有啲o靚模根本符合唔到質素。」
