近年大興土木擴建嘅海洋公園，其中一個重點項目係後年落成嘅「冰極天地」，仲計劃從俄羅斯引進白鯨、海象呢啲生物喺展館表演。不過，呢個計劃已引起致力保育海洋生物嘅團體不滿，噚日開記招炮轟海洋公園，變相助長捕獵海洋生物，當佢哋係搖錢樹。
引進白鯨 海洋公園被轟
香港海豚保育學會會長洪家耀話，夾硬將白鯨山長水遠由俄羅斯運嚟香港，強迫佢哋由自由自在嘅海洋野生環境，困喺人工環境，可能令佢哋抑鬱致死。佢話，擁有一級設施同專家嘅台灣國立海洋生物博物館，02年試過由俄羅斯引入十條白鯨，結果死剩四條。
洪家耀話，家海洋公園啲海豚已經又要頂波，又要跳來跳去咁表演，園方仲搞埋啲畀人近距離摸海豚嘅「豚聚一刻」活動，根本係向公眾灌輸錯誤觀念，所以希望園方唔好再搞「冰極天地」，唔好一錯再錯。
海洋公園回應話，係咪引入白鯨仲未有定案，總之野外引進只會係最後考慮，強調以唔影響生物可持續性為前提，亦會遵守所有國際公約、協定同法例喎。其實，既然咁大爭議，八方建議海洋公園不如考慮邀請呢期紅爆嘅德國八爪魚保羅訪港仲好，反正保羅叛國之後，魚身安全冇保障，香港輸入呢位貼波專才，肯定日日爆館呀！到時仲可以安排阿保羅貼吓邊個係下屆特首，反正香港人冇得話事，畀條八爪魚話事囉。
mailto:[email protected]