一講政治，讀者就有反應，有來函話何俊仁凉薄，不負責任，有讀者話民主黨無私無畏，敢為天下先，不枉佢投票支持二十年。另一位就話何俊仁出爾反爾，不值得佢再支持。更直接嘅，就係有讀者來電郵叫「左丁山收聲喇」，幾巴閉噃，講吓都唔得，要左丁山收聲？《蘋果日報》係全港最市場導向嘅報紙，冇人睇之專欄，自己會識做，唔使等到老闆出聲叫鬆人嘅。
《蘋果》全文刊出何俊仁之政改談判報告（七月九日），值得一讚，起碼慳番好多時間，唔使上網再搵，呢啲做法就真係為讀者着想，百分百userfriendly嘞。民主黨咁快就向公眾交代情況，透露出嚟嘅重要訊息不是中間人是誰，大家一早從其他報導知道係梁愛詩，對左丁山嚟講，最重要嘅，係從各方綜合所知，未來領導人習近平原來早在六月已經叫停，中央之轉軚，係由胡錦濤拍板嘅。習胡之間，有冇分歧呀？指定繼承人上台後，是否覺得不滿，將來對特區多啲阻滯？其實呢啲事情咁快公開，未必有利於特區，好似摑咗中聯辦一巴咁，徒增嫌隙。曾特首就反而冇所謂，站在佢嘅角度，政改大功告成，鬆咗一口氣，還有兩年任期，等收工，幾他條，啲最低工資法、公平競爭法、停車熄匙等等，是否通過，無關宏旨，咪等下任特首去跟囉。如果曾先生一定要做埋啲手尾，有一件事請佢老人家注意吓，特區之公共政策研究是否能夠搵到高人助陣。
七月九日政府賣廣告，招聘中央政策組首席研究主任、高級研究主任和研究助理，「首席」需要博士學位，五年研究經驗；「高級」需要博士學位，具豐富經驗，「助理」需大學畢業，有榮譽（goodhonours，即起碼二級榮譽），兩年地區研究經驗。
政府嘅要求就多嘞，薪水呢？「首席」月薪七萬五，「高級」月薪五萬，「助理」月薪一萬六千五，好似唔錯，但不可不知，冇博士學位嘅政治助理，月薪超過十三萬元不需博士學位，副局長更加月薪二十萬至二十二萬，即使話副局長已有二十年工作經驗，故此人工應該多啲，但政治助理嘅薪水都好高啫，比較之下，首席研究主任嘅薪水，唔啱比例喎。中央政策組「就公共政策事宜向行政長官及政府高層提供意見」，工作十分重要，啲政策研究人員薪酬相對偏低，不如叫啲政治助理去做政策研究嘞。