a四年一度，除了2002日韓主辦那一屆，香港球迷必須捱更抵夜追直播。四年又四年追波馬拉松，人生匆匆，能參與多少次？
b四年一賽，換了伴侶、離完婚又結過的人佔多少？上次跟你三更半夜齊齊熱捧意大利那位X，是不是早早就擯了出局？這樣，我們能怪責教練花心嗎？畀着你，一樣揀擇。
c世界盃不存在快樂足球這回事，輸波和輸身家後，你老婆和女伴即刻執行李走人，還會長傳餵個靚球給你勁射？
d八爪魚和Nike廣告，明年鵝頸橋hit爆。
e有人說梁愛詩做了球證，咁，民主黨是哪一隊波？何俊仁是縮水鄭大世抑或四眼蘇亞雷斯？
f下屆世界盃在巴西，下屆特首肯定不是曾蔭權，假如由曾德成做，一定要學澳門，政府買起直播權，畀市民免費睇波。香港球迷無可能少得過亞運迷吧。
g民主黨方案通過，埋門一腳，超級慢鏡頭重播，曾蔭權起錨那一球，算唔算入了白界？
h傷心獨獨民建聯，全隊十一人唔攻齋守，竟然畀對家起到腳，後衞擺烏龍將球頂入自己龍門。陳鑑林喊得比巴西阿哥慘情，就係咁解。