美國佬一手一腳以次按引爆金融海嘯，但自己三間本土評級機構，竟然無調低自己國家嘅評級，畀自己可以繼續以超低息發債頂住當地經濟。
但美國佬衰就衰在闊佬自己孤寒人哋，人哋嗰啲評級畀到低一低，令美國嘅融資成本比人低，於是個個媽媽叉叉話唔妥，要設立自已嘅評級公司，實行信自己，唔靠美國佬。
主權評級 中國高過美國
而第一個做到嘢嘅，就係我哋偉大嘅祖國！攞到人行同國家經貿委批准成立嘅民企大公國際，噚日發表咗首份國家信用評級，以自己創建嘅新型國家信用評級標準，為50個國家評級。中國排第十，前景穩定；美國就排第十二，前景負面；同美國佬個評級完全係兩碼子事！
大公有27個評級同美國佬有好大出入，一致高於三間評級機構嘅國家，主要集中喺政治穩定、經濟表現較為優秀嘅新興市場國家；一致低於三間評級機構嘅國家，主要集中喺經濟發展緩慢、債務負擔日益沉重嘅發達國家……連大公國際自己都解釋，結果明顯反映響唔同評級理念指導之下，對國家償債嘅能力喺判斷上嘅差異。
咁大公夠唔夠權威？應該夠o架，唔係人哋中國四大銀行、八個地方政府，都唔會搵佢做信用風險管理顧問喇！
中美評級機構比較
‧大公國際 中國（外幣）：AAA 美國（外幣）：AA
‧穆迪 中國（外幣）：A1 美國（外幣）：Aaa
‧標普 中國（外幣）：A+ 美國（外幣）：AAA
‧惠譽 中國（外幣）：A+ 美國（外幣）：AAA
李華華
mailto:[email protected]