天意弄人，往往出人意表。向來與黨友未算深交的鄭家富，今年5月與黨友同行上海世博團時感情大躍進，南非世界盃又進一步將彼此距離拉近。偏偏與黨友逐步發展政治以外的情誼之際，卻突然晴天霹靂殺出政改程咬金，道不同，鄭家富只好忍痛提分手。再見亦是朋友，鄭家富向舊愛送上一句「祝你好運」。回復自由身的他說，瞓街激情猶在，「我會話畀人聽，我係冇謝到」。
民主黨這三個字，16年來一直頂在鄭家富名字之前。1994年，民主黨創黨；同年年底，鄭家富首次當選區議員，「民主黨出世，就係我從政第一年，大家一同成長」。
7.1遊行烈日當空，坐在梯子上叫咪的鄭家富三番四次「穿崩」：「各位好，我係民……我係鄭家富。」每當說到「民」字就立即改口，因為他已經退出有份創立的民主黨，與在捱罵中遊行的前黨友分道揚鑣。
02年「嘍」陶君行退黨
「世事往往係好曲折又非預計之內」。分手前未必有先兆，向來有自己生活圈子，與黨友是政治上夥伴多於死黨的鄭家富，月前參加立法會上海世博訪問團時，才與黨友建立了更深感情。「喺黃浦灘，聽住張文光話三十幾年前，改革開放前嚟過，同家有乜分別，我真係聽得津津有味」。世博行後有世界盃，民主黨內個個是波牛，「我哋約埋喺李華明屋企一齊開枱、睇波，我覺得大家喺政治以外嘅生活開始輕鬆咗啲」。
就在發展形勢大好的時候，「就整單咁嘅嘢（政改投票）」。他說：「以波論波，巴西同阿根廷唔應該輸；以政治角度睇，民主黨唔應該支持方案。不幸作為球迷同民主黨黨員嘅我，對呢兩件事都好傷感。我覺得世事真係難以掌握，你認為條路咁走，偏偏個天係另有安排。」
其實鄭家富不是第一次有意退黨。02年，民主黨未有將最低工資問題納入黨綱，黨內少壯派不滿。鄭家富說，當年他主動「嘍」陶君行「不如過檔去前綫啦」。陶君行及其他少壯派坐言起行過了檔，始作俑者鄭家富卻留下來，「因為我唔甘心將地區工作拱手畀信念唔同嘅人，亦唔信個黨會唔支持最低工資，覺得要忍到令佢哋明白我嘅睇法」。
8年後，不用說民主黨，連政府也支持最低工資立法了。等到修成正果，他卻要退黨了，而最關心他是否退黨的，就是那些不再少壯的「少壯派」。「其實到家，我諗佢哋（陶君行等人）都仲有少少嬲我o架，23號嗰晚（宣佈退黨前一晚），有無數少壯派傳SMS畀我，叫我今次唔好再轉軚喇……哈哈哈」。這些短訊是諷刺還是勉勵，他說不深究了。
曾擔心被指過橋抽板
上月24號，他在立法會發言期間，含淚宣佈退黨。他說：「當時考慮嘅因素，係我嘅離開，對民主黨係唔係好大打擊？我會唔會俾人話係反骨仔？又會唔會俾人覺得我借民主黨過橋抽板，有毛有翼就要飛？」終於選擇離開，就像戀人，看着對方「變」了，除了分手，別無選擇。「呢個變究竟對民主黨發展好定壞呢？何俊仁就好樂觀，覺得擴闊咗政治版圖，但我就好擔心唔係擴闊版圖，而係自己走進一條死胡同……喺呢度我會祝佢（民主黨）好運，唔係咒佢嗰隻，係真心，走咗都唔想個黨衰。」
鄭家富說過，沒有華叔就沒有他。97年被欽點陪同司徒華及李柱銘到美加籌款，過程至今難忘，他說現在回想也忍俊不禁。他說：「馬丁最鍾意講有味笑話，佢成日笑我：最後生嗰個要成日托住華叔碌嘢（書法用品）周圍行。華叔有時都會回敬幾句，有次華叔唔記得拎袋，馬丁又笑我：鄭家富你淨係顧住托華叔碌嘢，又唔見咗華叔個袋，華叔竟然搭嘴，叫我快啲幫佢搵番個袋，哈哈哈。」
「屋企一啲都唔民主」
有味笑話是男人共通語言，政見分歧可不能和稀泥。華叔一句「天要下雨、娘要嫁人」，鄭家富沒有太大反應，倒是一番「豬狗論」，令鄭家富心如刀割，再加上昔日一同瞓街的劉慧卿向左派陣營「揮手講話」，「我覺得點解會咁嘅呢？到家都百思不得其解」。
自詡是「潮州大男人」的鄭家富對家人向來「口講諮詢實質知會」，「我個細女成日話我，你話就話係民主黨，但喺屋企一啲都唔民主。」今次退黨，「我所謂問吓佢哋意見，其實就等佢哋知道就得」。他為退黨與否天人掙扎，在港大修讀建築一年級的大女比他瀟灑，「佢話如果你覺得民主黨冇乜人傾到偈咪走囉。年輕人心態係咁，冇friend咪離開囉。我覺得都係，何必咁辛苦呢」。
現時80後衝鐵馬，96年時鄭家富也瞓過街抗議小圈子選舉，當年被視為激烈行動派，如今年過半百，他會否還有當年勇？鄭家富搶着說：「我梗係仲有衝勁啦。好多人同我講，我以為你已經謝咗好多年。我同佢哋講，我係冇謝到。以後自由身，有啲嘢睇唔過眼或者唔滿意，我都會自己發揮，我相信我係唔會就咁謝咗！」
記者 許偉賢
