「嘩！我今日下晝撞到阿徐呀！」朋友一坐下來便說。
我很肚餓了，其實想他點菜先，但見講古仔者那麼興高采烈，只好忍忍，由他說。
但，其實徐濠縈小姐又有多難「撞到」呢，大家都是逛那幾間店買那幾個牌子，沒在中環碰頭也在銅鑼灣金鐘巧遇吧？有甚麼值得以頭條新聞的語氣發佈呢？
「咁呢？」我說。
「咁呢……我見佢啱啱喺置地文華行出嚟喎，灰色大膊頭sweatshirt灰色leggings咁喎，咁條腰梗係有條米色粗皮belt咁啦吓，腳踏MBT凉鞋厚襪，另加Céline手袋咁啦吓……」
「得喇得喇，我知阿徐係點嘅，唔使咁詳盡啦……」我有點不耐煩了，因為真係好餓。
「你聽埋先啦……」他繼續，「咁我見佢睇唔到我，咪諗住走埋去擁抱佢嚇吓佢咁囉，點之我張開手行過去差三步就掂到佢時，突然發現：『哈！點解阿包包（阿徐女兒）今日條裙咁肉酸嘅？個人又高咗咁多嘅？』好在就喺嗰一秒鐘阿徐擰翻轉頭，咦！點解塊面咁圓？我先知認錯人，幾乎真係攬咗落去呀，到時實俾人叫非禮都得呀！」
「哦~」
朋友又話：「話時話吖，呢排真係好多人學佢着衫呀呵？條街度真係好多個阿徐呀呵？」
「嗰啲唔係叫『阿徐』」，我笑說，「嗰啲叫『阿腿』！仲有一大班『阿舉』、『阿嘴』、『阿水』、『阿許』同『阿女』……」
強烈聲明：我不是笑普天下的「阿腿」，我衷心感激她們也來不及呢，相信真「阿徐」的心意亦一樣，看下去你便明白。
阿乖
讀書時代常有死黨以肉緊口脗報信：「你知唔知呀，你買咗嗰對鞋呢，阿AAA同BBB又買咗呀，我覺得佢哋抄你囉！」
初入社會工作時也常遇到戥我唔抵的好同事：「你上次嗰件XXX呀，阿YYY同ZZZ又跟你買埋一模一樣呀！」
少不更事的我，當時也真的覺得有點唔抵，更怕那些一齊行街時，見我買嘢又問我「介唔介意我都買一件呀？」的朋友，唔通話「唔得呀，我介意呀」咩？
要花了我很長很長的時間，大概是30歲過後吧，才搞得清楚事情的重點，才領悟出同類事件背後的意義──不單止唔介意，直頭mypleasure！求神拜佛，望都望你跟，千祈唔好唔跟，如果你發現我呢排着嘅用嘅讚好嘅你冇一樣想跟，記得話我聽，我驚過你，我一定會返去好好檢討──近年的我，抱着的是這種「報務」態度。
有一日如果發現身邊的「阿乖」、「阿齋」、「阿呔」、「阿街」和「阿Buy」的數量大幅減少的話，阿Y或者是時候退出購物界，改寫食經馬經和波經了。
你適合做「時裝界」嗎？
不是說甚麼「icon」或「達人」咁誇張，就算只當一個低調務實的時裝業者，比如時裝店老闆、買手、fashionMagazine的編輯、記者，或者我只是個小小的時裝專欄作者，這種「有人跟」的特異功能都是必須的。
換句話講，如果你問我你適合不適合從事和時裝有關的行業？我大概就會反問你：一直以來，你身邊多不多「學你着衫」、「跟你買嘢」和「聽你支笛」的人？如果答案是「冇乜」，對不起，我大概要告訴你殘酷的真相：及早考慮轉行或者對你自己和世界都更好，你的能力與才華，應該另有更能發光發熱的地方，而不是時裝界。
不好意思，時裝這回事，本來就有邪教feel，所謂「潮流」正是由信眾「跟」出來的，說穿了，那些styleicon就是甚至不必開口，便sell到嘢的超級推銷員，與個人魅力有關，但與品味修為卻未必掛鈎。換言之天生靚樣的偶像明星或唱歌特別好聽的歌手，他們擁有那股懾人的氣場，分分鐘令他們一個唔覺意做埋潮流達人，但睇真他們揀衫襯衫可能幾得人驚，但總之「有人跟」你就吹他唔脹，對，是不公平的，可惜我們有爭取公平的力氣也不會用在這方面吧。純靠眼光品味的人要走的路當然較曲折，甚至乎離奇，但你挑選東西和配搭服裝的功力厲害到能招惹一窩蜂的話，亦總能殊途同歸，反正到了目的地，就別再考究是坐甚麼車來，或兜了多少路才來到。
想打「時裝工」的人聽到這「旁門左道」的先決條件，也許心灰意冷從此被打沉，那麼我告訴你個小故事。
坐的士時常遇到有司機對我說這樣的話：「嘩，你寫咁多稿，填咁多詞真係要好叻先做到喎！」我標準但真心劃一的回應是：「關咩事！每個人有樣嘢拿手啲好正常啫，我又夠覺得你揸的士好叻啦，又認得晒香港啲路，你叫我一日揸住架的士十幾粒鐘我就唔得嘞！」
就是這樣，有人「學你着衫」、「跟你買嘢」、「聽你支笛」的人就去搞fashion，其餘的人，我總有日「學你煮餸」、「跟你買樓」、「聽你的美容/健康/旅遊……貼士」的，到時請你點條好路我行，不要擺款啊！嘻嘻！
本周勉勵
被認為是「阿腿」的人切莫自覺次等，這個世界就是「有人煮飯有人食飯」、「有人參政有人投票」、「有人寫書有人睇書」、「有人帶領潮流有人跟」那麼簡單，也無分誰比誰高尚。況且換了一個情景時空，「阿徐」也會變成你的「阿腿」的。
例如我每逢剃了鬚那日便有路人對我說：「你同肥媽個節目我成日有追！」留了鬚那日便有人問我：「咦，乜你今日唔使同阿蘇出外景咩？」戴了眼鏡那日就有人稱讚：「你套《男人之虎》真係好好睇呀！」哈哈哈！
Textby黃偉文
mailto:[email protected]
微博 http://t.sina.com.cn/wymanwong
本欄逢星期日刊出
