將軍澳啲屋邨商場迷宮咁款，老實，純粹迷路，唔識上商場先屈入街市，又好彩喎，俾我發現檔好嘢食。
話說行行重行行，忽然有人問：「靚仔食咗飯未？」Callme靚仔，點都要停低望望乜料，「未食？」一自稱香太嘅老闆娘，指指易拉架上面三隻大字「有口福」介紹店名：「未食你就有口福咯，埋嚟睇吓有乜啱食？」Gag，係爛咗啲，但食物就一啲都唔爛，見肚餓，先嚟碟秘製台式炸雞扒，乜式物式、秘唔秘製我唔Care，最緊要即叫即炸熱辣辣，我畀十個得！再嚟多碟鐵板黑椒炒腸粉，腸粉炒得夠香，黑椒味濃到攻鼻，牛肉醃得夠入味，又係即叫即炒，唔會屈你食橡皮擦紙膠，我畀十一個得。吹多兩嘴，香太繼續硬銷：「試唔試埋芋絲榴槤角？好多客試過都話好，豬扒包都好正o架，酸辣粉日賣過百碗……」我唔係大胃王，食唔晒所有推介，但人龍不絕係不爭事實，梗係啦，碟碟份量十足兼廿皮有找，唔多人撐有鬼咯。
（Choikei）
鐵板黑椒炒腸粉（$13）：
可選雞牛，腸粉彈牙，鐵板燒出濃濃黑椒味，隔九丈遠都聞到。
秘製台式炸雞扒（$15）：
「麪包糠溝過秘製料先炸。」乜秘製料咁巴閉？「話明秘製點話得你知。」OK，唔問，淨係要知即叫即炸，熱辣夠飽肚就得。
芋絲榴槤角（4件$10）：
表面炸成金黃色，咬落卜卜脆，開勁香榴槤味，望到已經想食。
重慶酸辣粉（$12）：
餡料有花生、肉醬和正宗四川醋，麻辣醬重，日賣過百碗。
豬扒包（$10）：
中間件豬扒幾大塊，即叫即煎唔會鬆泡泡，女生一件都夠頂肚。
有口福
（將軍澳厚德邨萬有街市1A舖）