上月中在「澳彩」投注世界盃賽事，因贏到「爆煲」而少收25萬元的黃先生，質疑澳彩職員有責任預先提醒客戶，否則就是變相接受超額投注，而且有殺冇賠。事隔近半個月，他仍氣憤難平，致電澳彩投訴，以下是他與澳彩發言人林小姐部份對話。
黃：如果我投注500萬，你哋每日最高派彩連本金又係500萬，咁咪即係輸咗就殺，贏咗就冇得賠，咁咪永遠都有殺冇賠？
林：係！
黃：其實你公司有冇責任喺我投注嘅時候提醒我派彩上限呢？
林：我哋公司暫時冇呢條措施，因為我哋員工係唔會清楚客戶當日投注啲飛，係咪全部都有派彩，員工亦睇唔到客戶當日投注額去到幾多。
黃：咁點解我買過關時又會提醒我最高賠50萬？
林：如果電話投注嗰個員工盡責，可能會順帶提一提。
黃：咁如果我投注600萬中咗，咁賠幾多？
林：派彩上限500萬，超過派彩總額的本金會退還。超過投注的本金會退回。
記者翻查澳彩網頁，發現澳彩規定「每一投注戶口每日最高之派彩總額為港元$5,000,000（包括本金），若任何投注之派彩超過上述派彩總額，所有超額派彩之投注只會退回本金。」
對於今次事件，有多年賭博經驗的立法會議員詹培忠形容事主可以下注數百萬元賭波「都唔係普通人」，贏了500萬元，已經「偷笑啦」。他說，每家博彩機構都有自己的規則，職員未必有責任，每次接受客戶下注時，都要講解派彩上限的細節，所以博彩人士為保障自身利益，特別是下注前，不妨花時間，細心看清楚博彩條文，特別是派彩上限，是否連本金和彩金合併計算。
本報記者