好耐無聽到玩Wii飛爆電視慘劇！體感遊戲仍係老任招牌，繼經典作Sport同Fit後，下星期將新返超熱鬧WiiParty；同場4人惡鬥，最新穎莫過於打機唔使望實個芒，單靠Wiimote就玩到遊戲，要招呼班Friend，又多項選擇！
記者：陳國輝
攝影：譚盈傑
Model：Rita@PureModels
二人行 靠合作
有時幾個Friend一齊打機，唔一定你死就我亡嘅！好似遊戲內嘅PairParty，就要求兩名玩家同時具備良好嘅協作能力，才可順利過關。好似有款Wii版海盜船，狀似海洋公園嗰隻，不斷左搖右晃，玩家須控制船杆令船身平衡，在限定時間內救番指定人數，咁你就過關。另一款MiniGame，屬於較傳統嘅划艇遊戲，兩名玩家只需做出協調動作，令橡皮艇到達終點就過關。
四人戰 鬥一番
講到底，最刺激、最具挑戰性，始終係四人互片！如果玩厭咗「LivingParty」，不妨玩番傳統小遊戲，加埋晒約有80種咁多，可一至四人齊齊玩！想熱鬧，可以玩吓賽馬仔、直升機救人；而考腦筋嘅，亦可選擇Wii版大富翁，或鬥快答問題，不過中文行版尚未計劃推出，如果你識日文，梗係要試！另外，日版《WiiParty》將加推特別同綑版，盒內會有埋粉紅色或白色手掣，售價定為6,800日圓，折合港幣約$600。
手掣捉迷藏事件
可能你會問：「唔望芒點打機？」你甚至會懷疑，唔通老任出咗款有芒嘅手掣？錯晒！《WiiParty》最大賣點，係新加入一啲純體感MiniGames，佢叫做LivingParty。呢次講嘅體感，唔係叫你當手掣係隻球拍或者軚盤咁簡單，想成功K.O.其餘3名玩家，必須依賴你嘅官能與觸覺；講得太複雜？舉個例子，遊戲中有一款MiniGame需兩個以上玩家參與，手掣會變成一個炸彈，然後你要喺限時內交畀另一個人，餘此類推，直至其中一人太過緊張，連手都震晒，Wiimote會計算震動波幅，如果超出範圍，佢就會馬上爆炸！
另外，仲有一款捉迷藏MiniGame，三名玩家會先將Wiimote收喺隱蔽地方，然後你要在限時內搵佢出嚟，喺搜索途中，手掣可能會發出奇怪嘅聲音提示你，若然夠鐘仍未搵到，當然係你輸啦！與前作最大分別係呢一次遊戲畫面只作輔助性質，其實你唔望住佢，也一樣玩到。
Profile
平台：Wii
類型：MiniGames
玩家：1-4人
售價：4,800日圓
（約港幣424元）
