現年88歲嘅賭王何鴻燊舊年跌傷頭入院，康復得一直好好，早幾日忽然入咗養和，雖然話係做檢查，但都搞到全城戒備，不過，噚日佢已經出咗院，平安返咗淺水灣道大宅屋企。
超蓮：唔方便講
噚日朝早11點，長房女兒何超雄去咗醫院探望，之後三房索女何超蓮都有到，問有關老竇嘅事，佢就一反常態話：「唔好意思，我唔方便講。」超雄離開時，就話賭王檢查結果好好，佢話：「好好，佢好精神。」四姨太梁安琪都有去過醫院，之後仲去咗大宅探賭王，佢喺電話度話：「好早返咗屋企喇，都話咗係例行檢查，冇嘢，冇事。」
二房細女何超儀噚日就第二年幫景福旗下嘅AlainPhilippe手錶做代言人，佢喺中環出席宣傳時，獲大會送咗約6位數字嘅10卡鑽石手錶。問到賭王入院檢查，超儀不願多講，仲暗寸說：「我都唔知乜事，唔覺得佢有事，應該例行檢查。其實我向來都係唔特別講呢啲嘢嗰個，不如你哋問番講嗰個啦。」問係咪覺得有人講多咗，佢話：「唔知喇，香港言論自由，freeworld。」
《維》片釜山參展
另外，超儀憑電影《維多利亞壹號》第六次參展釜山電影節嘅特別之夜，又會做8月倫敦電影節，仲搵到個發行商高價買咗套戲，可惜超儀遲啲要去上海世博演舞台劇，所以要搵老公陳子聰做代表。
