醫管局成日俾人批評投放喺精神病人嘅資源唔足夠，病人每次見醫生只係得5至7分鐘，近日連堅持每個症睇30分鐘嘅青山醫院高級精神科醫生曾繁光都話要轉投私營市場，第二時唔知醫管局仲有冇人會用咁多時間睇一個症，連佢做開嘅變性人心理治療，都有機會喺公立醫院消失。
「只求過得快樂」
曾繁光喺醫管局做醫生做咗四分一個世紀，形象正義敢言，今日選擇離開，難免令人懷疑背後原因。曾醫生話：「我唔係走咗就同醫管局冇晒關係，我仲要返去做supervisor，走只係因為做咗50年人，想做啲自己真係想做嘅事，只求過得快樂！」曾醫生口中嘅快樂人生，包括陪大女揀大學，並且將自己做父母嘅心得，教吓其他人。
曾醫生走得快樂，跟住佢嘅30幾個變性病人，又何去何從？「理論上每個醫院聯網都有為佢哋提供精神科服務，但有服務係咪等如有人肯做，或者係咪做得好，就好難講。」