做人太執着，永不會快樂。34歲的梁詠琪（GiGi），從不承認自己是中女，經歷過事業低潮、感情重創，反而令她有所領悟—放下執着。現在的GiGi學懂享受過程的快樂。縱使與鄭伊健、外籍男友Sly的戀情曾經是刻骨銘心、曾經是矚目話題，但在GiGi眼中，這一切一切都已是過眼雲煙。 撰文：李珮洳
30歲以上女性會被喚作「中女」，34歲的梁詠琪絕不將自己列入中女行列，只會以「知性的女人」來形容自己，她說：「我都唔明點解要有中女呢個名詞，其實女性踏入30歲，已經好有人生經歷，同埋識得去享受所有嘢，仲會用智慧去生活。30幾歲嘅女人係要心靈上有提升，多過喺地位、名利上提升。」
30大關順利過渡
30歲無疑是一個關口，GiGi過了這一關，處事放鬆了許多，她說：「以前我入行太順利啦，當時自己嘅信心仲未buildup，其實信心都係喺挫敗中建立番嚟，令我更認識自己、接受自己。家我唔會對自己有太多無謂要求。」GiGi口中形容「以前的她」是「懶」有正義感的人，事事看不過眼，這點連自己也不明所以，她說：「我以前乜都覺得要公平公正，任何事都好有原則，其實嗰時自己好辛苦，亦搞到身邊嘅人好辛苦。家嘅我就會學識接受，以前乜都計住，會miss咗過程中嘅樂趣，所以做人唔好有太多無謂嘅執着，就會活得開心。」
唱舊情和平散去
工作上GiGi放下執着，感情又如何呢？早前與外籍男友Sly分手的她，揚言經歷過幾段感情後，學懂了享受拍拖過程，她說：「一直以來傳媒好鍾意將好傳統嘅諗法套落藝人身上，我想講唔係個個女人都係要28歲結婚、30歲生仔、嫁個有錢人。兩個人一齊唔開心，就算簽咗張紙又點吖？我咁諗並唔係因為對愛情睇法悲觀。」
有指與Sly分手是因為其母不接受，GiGi澄清分手是因為中國人與外國人思想上有差距，看不到大家的將來，她說：「我同佢雖然唔再係情侶，但大家仲係好朋友，佢係一個好值得欣賞嘅人。」不過當提到舊愛鄭伊健時，GiGi卻說：「唔好再問我啦，真係冇必要再問啦，每次邊一方有事都要問另一方回應，我唔想成日講啦，佢同我都有自己嘅生活。」那是否與Sly一樣都是好朋友？GiGi說：「呢個唔需要交代。」
GiGi在新碟中有首歌《和平散去》，正好代表她對感情的想法，她笑說：「兩個人之間有衝突，咪因為執着囉，男女之間其實可以和平散去o架，合則來不合則去。之前我覺得有付出一定要有收穫，事實上付出咗冇收穫都係一個收穫，因為喺一段感情中嘅學習都會有所得着。」
期待香港格林美
GiGi最近為廣東大碟《怕寂寞的貓》擔任監製，事事親力親為，當中的無形壓力令她不勝負荷，終於在拍宣傳照當天哭了出來。GiGi說：「以前我簽唱片公司，所有嘢都有人幫我搞晒，因為入咗行咁多年，我好想參與更多落呢隻碟。」GiGi透露今次公司投資了200萬，她沒期望唱片會大賣，更沒寄望於頒獎禮上得獎。
記憶中GiGi已成為「白果黨」，問她會否希望再在頒獎禮出現？她說：「我dayone做呢隻碟目標唔係頒獎禮，而係呢幾年成日飛入內地做嘢，做廣東碟係想做番一樣有歸屬感嘅嘢。至於頒獎禮試過就知乜嘢事，我暫時冇興趣回歸頒獎禮，如果有一日香港會有一個好似金曲獎或者格林美嘅頒獎禮，我會參加。」
放棄愛情得着和平
「見證過戰爭的恐怖，我信分手可以很美好，如沉默得到傾訴，仇恨得到禱告，人越放下愛得越高。」梁詠琪新歌《和平散去》，委婉地訴說了她的心聲，放下了過去式的愛情：「共你再次找得到笑聲，散去以後和平。」
攝影：林德雄
化妝：Johnathan.Y（make360.com.hk）
髮型：ZIV.Y（ORIENT4.com.hk）
服裝提供：Escada
場地提供：TheQuarterdeck