端午節唔喺香港，錯過睇大隻佬扒龍舟嘅精采畫面，好在仲有機會，因為移師咗沙田嘅國際龍舟邀請賽，今年又重返維港，旅發局乘機大搞，喺7月23至25日，用1500萬蚊將成個尖東變成龍舟嘉年華。
國際龍舟邀請賽最特別係有傳媒盃，韓國KBS電視台嘅DreamTeam一定最搶鏡，因為有當地組合2PM嘅Joonho、U-Kiss嘅Alexander，聽講仲可能有SuperJunior成員㖭。係咪想尖叫呢?但到時肯定唔夠啲小妹妹爭靚位啦。睇怕旅發局主席田北俊唔係咁諗，佢梗係想韓國女星或者女主播嚟扒龍舟啦。佢惟有寄望扒浴缸大賽，睇吓會唔會有女仔參加。今年總共有191隊參賽，多過舊年一倍，DiscoveryChannel都會嚟拍攝。
舉行龍舟先生小姐選舉
尖東百周年紀念花園屆時會有個「生力暢飲樂」，有20個啤酒同道地小食攤位，又有歌手、DJ表演，仲會「七月飛霜」，即係落假雪等大家凉快吓。最搞嘢係有龍舟先生、小姐選舉，其中龍舟先生，要手瓜起先似樣，但龍舟小姐如果都係咁……真係要拭目以待。附近嘅繽fun天地，會有攤位遊戲，又介紹吓龍舟歷史，比較啱一家大細。以上活動全部都唔使入場費，預計有5萬人參加，已經有5,000個旅客報團嚟玩喇。
電郵：mailto:[email protected]