多得煲呔千揀萬揀，係都要揀葉劉嘅愛將、南區區議員陳岳鵬做特首辦特別助理。南區薄扶林選區嚟緊又要補選，政府噚日刊憲，話提名期由本月23日開始，下月5日結束，如果超過一個人合資格參選，就會喺9月5日舉行補選。
社民連盛傳會派出「維園阿哥」任亮憲出選，噚日創黨主席黃毓民就同葉劉話，社民連今次若派人出選，都係學嘢成份居多，仲話「我哋邊夠葉太抽吖」。跟住又向葉劉大笠高帽，叫葉太應該自己去選，咁後年就可以做超級立法會議員，到時選埋特首都仲得，仲話屆時會「慎重考慮」投票支持葉劉。葉劉聽後自嘆屆時「好老」，但就叫八方將黃毓民言論記錄在案，話「毓民咁講，我仲光榮過選到呀」。