白鴿黨六人組報告前日一出，以為可以暫時平息外界對該黨嘅懷疑同攻擊，點知阿爺特派密使梁愛詩噚日即刻出聲明澄清，話唔係佢今年2月12日主動搵民主黨傾政改，而係民主黨舊年12月22日喺飯局中話希望同中央溝通在先。
燒乳鴿收支持者花籃
詩姐呢個聲明真係殺白鴿黨一個措手不及，搞到噚日開完立法會內會同財會後，準備返屋企唞唞嘅張文即時折返政府總部，陪主席仁哥同李永達開記招回應。原來，呢個詩姐口中「雙方友好安排的午餐聚會」，唔係喺密會熱點金鐘港麗酒店舉行，而係喺高官政圈嘅飯局熱點──中環鏞記擺陣。
仁哥噚日喺記招上承認，自己同張文的確係12月同詩姐食過飯，但指當時佢哋三人都係客，因為個飯局係由《明報》兩位高層張健波同馮成章邀約，佢話「係由《明報》兩位老編張健波同馮成章主動請，大家傾偈」。
張文同仁哥坦言已經唔多記得當日食咗啲乜，只係記得當日有食鏞記最出名嘅燒鵝，仲幾好食。所謂燒鵝打人牙骱軟，唔知有冇因為呢隻好味燒鵝，間接促成詩姐向中央轉達白鴿黨嘅心意呢？但相信白鴿黨同佢哋都勢估唔到，當日吔咗呢隻燒鵝，會搞到白鴿黨今天被寸為燒乳鴿。不過，白鴿黨似乎一啲都唔介意變燒乳鴿，仲話今次政改投票深得主流民意支持，噚日白鴿黨喺政府總部開記者會前，八方喺現場就見到擺放咗三個署名「你的支持者」嘅花籃，當中分別讚何俊仁「為國為民」、張文光「造福人群」，以及向「瞓街卿」變「揮手卿」嘅卿姐致敬嘅「德政可風」。
雖然有花籃坐鎮，但詩姐出招，白鴿黨拆唔拆得掂仲係未知之數，因為好多人即刻質疑，咁白鴿黨之前係咪有隱瞞？佢哋一早想溝通，係咪因而唔玩公投？
《明報》高層公開解畫
除咗白鴿黨頭痕，被拖落水嘅《明報》亦搞到要公開回應。商台嘅李慧玲噚日喺《左右大局》請人稱「張波」嘅張健波解畫，仲話洋名阿Paul嘅張波好似貼中世界盃賽果嘅德國八爪魚保羅咁，一樣具備先知功能，好似估到中央會接受民主黨嘅改良方案咁喎。
mailto:[email protected]