若果普選「最撐得官員」，財經事務局局長陳家強一定可以得到華華我神聖嘅一票！之前頻頻撲撲四出撐煲呔起錨唔在講，好似噚日咁呀，朝早不請自來忽然現身國泰君安（1788）嘅上市儀式，下晝又要去幫合和公路（737）發人民幣債券打氣，日撐夜撐，你話唔攰至奇啦！
據公關界路邊社消息，噚日「焗」強哥去國泰君安上市儀式「罪魁禍首」，原來係上海市金融服務辦公室主任方星海！話說方星海事前都無通知主辦單位會南下為呢隻IPO撐場，估唔到畀咗個surprise大家。收到風人哋上海財金一哥會到，身為香港財金一哥嘅強哥，當然唔敢怠慢，嗱嗱聲即刻到啦……
呢個小道消息，大家不妨聽一聽喇！話唔定……係海哥早個禮拜已經響陸家嘴論壇，約定強哥噚日再聚影番張相留念都未定呢！
不過，話時話，點解方老大咁有誠意南下撐場，無理由只係想「祝『君安』好」咁簡單呀？口痕友話，可能佢係想「穩定軍心」同埋「宣示主權」啫！
而根據國泰君安啲高層講，佢哋同第二大股東北京匯金嘅股權糾紛，令A股上市計劃一拖再拖，但為「響應」方老大嗰句：「凡是能夠上市的金融類市屬企業都要去上市」，so，「在香港上市，是沒有辦法的辦法」，試問方老大又點可以唔到？
雖然得到滬港兩位財金高官「祝君安好」，但國泰君安嘅股價似乎唔多安好喎……噚日港股升市佢都可以跌穿4.3元嘅招股價，4.14元收市，好失威唧！
李華華
mailto:[email protected]