小妹唔算大膽，見到小強之類嘅快速移動生物都怕怕，如果有成千上萬嘅四腳蛇、同蟒蛇咁出現，真係唔知點算。但假如大家鍾意參觀稀有爬蟲動物嘅話，下星期舉行嘅香港國際爬蟲節2010應該會滿足到，到時會展出二萬幾隻蜘蛛、甲蟲、蛇、同蜥蜴，全部屬罕有品種，仲有世界級嘅爬蟲專家現身交流心得㖭。
火蠑螈可活90歲
爬蟲展主辦單位噚日安排咗7種非常珍貴、黑盟盟嘅爬蟲率先亮相。香港爬蟲專家KKKwok同小妹講，呢7種爬蟲之中，最難得係歐洲原生，包括可以長命到90歲嘅黑色火蠑螈，喺歐洲列為高度保護，俗稱「壽星仔」；其次係全世界只得一條嘅南美黑色泰加蜥，表皮閃閃令。
蛤蚧王首次亮相
仲有首次喺香港露面嘅黑色蛤蚧，有蛤蚧王之稱；佢都幾惡死，摸下就呱呱叫。至於黑色皇帝蛇就最霸氣，佢俗稱響尾蛇殺手，同響尾蛇惡鬧，可以將對方生吞落肚。黑色美西螈再生能力超強，連科學家都解釋唔到，點解斷手斷腳話咁快就生返出呢。
到時展場仲會有1,000隻智利蜘蛛、1,000隻日本甲蟲、同3,000隻青蛙參展。展覽7月16至19日喺九龍國際展貿中心舉行，門票成人每位30蚊，小童就20蚊。
電郵：mailto:[email protected]
