郭偉亮（EricKwok）與陳哲廬（Jerald）由Snowman變成Swing，Swing於2002年解散。2009年Swing重組推出專輯，大熱作《我有貨》的搞笑MV令樂迷印象深刻，不過二人即將面對另一次解散，原因是Jerald會與太太及女兒到加拿大生活，所以下一張大碟相信會是Swing的告別之作。
兩年前Jerald主動聯絡Eric，希望於離開香港前再以Swing的名義出碟，他說：「兩年前我同佢講，話不如喺我離開樂壇之前合作多次囉，嗰時冇諗過佢答唔答應我o架，唔應承又唔會嬲佢嘅，佢話OK咁咪做囉。」
「上機先唔捨得」
結果Eric與Jerald再以Swing之名重出江湖，還拍了個搞笑MV《我有貨》，一新樂迷耳目。Eric表示一早知道今次是Swing最後一次合作，暫時他仍未有不捨得，他說：「一日都未做完件事，都未有嗰種感覺，可能到佢上機先唔捨得啩。其實佢老婆等佢離開香港等咗8年啦，係時候要走啦。」
Swing推出多一隻大碟、於7月舉行拉闊音樂會，或者之後舉行多一次Swing音樂會，之後二人就會各走各路。不過將來的事有誰可預料，Jerald覺得Swing只是一次較長時間的分開，可能不知多少年後，他們會再聚頭。
解散致友情冰封
十多年的相處，Jerald與Eric當然會有拗撬，當年因為Jerald提出解散，令一段友情冰封，他說：「我嗰時覺得唔知自己做緊乜，日日係咁做但又冇滿足感，好辛苦，唔明做乜要出嚟做宣傳，做音樂唔係要咁做。」
在旁的Eric補充說：「嗰時佢成日話辛苦唔做，又話要返加拿大，我咪勸佢囉，到佢好認真話解散，咁咪唔做囉，解散前一段日子，我哋兩個都冇嘢講。」對於最後一次，Jerald與Eric最希望繼續做出令樂迷滿意的音樂，起碼在畫上句號前好讓大家留下一個美好的回憶。
採訪：李珮洳
攝影：黃文成
服裝提供：7forallmankind