「知唔知乜嘢叫坐監呀？」坐監唔止好似電影《無間道》入面阿儍強咁，連老竇死咗都冇得去送殯，喺現實生活，坐監重包括冇得睇世界盃直播──除咗94年罕有嘅例外（意外？）。
八方最近同一位退休一級懲教助理傾開，佢當年駐守壁屋監獄，世界盃在美國舉行，有日早上7點開波，尼日利亞大戰保加利亞，當日佢喺飯堂帶犯去開工，突然有四個尼日利亞犯喺飯堂坐低，話大早申請咗可以唔開工睇世界盃。
呢位懲教助理事前冇收到上頭柯打，亦覺得無啦啦點可以畀你唔開工去睇波？唔肯就範，直到上頭介入，四位非洲犯人終於有得睇波。不過位懲教助理後來竟然俾上頭投訴佢講粗口，最初要罰200蚊同接受嚴重斥責，後來佢據理力爭先討回公道。家陣犯人仍然冇直播世界盃睇，但可要求署方錄影，食飯時間睇，如要知即時賽果，就只能偷偷聽收音機。