成日講5.1、7.1要點Set，其實真係對聲音有要求，就2聲道都要執靚佢，尤其係音樂發燒友，由器材挑選，到喇叭擺放都好有技巧，絕對唔係亂放，今日就講吓發燒音響，要點玩！
記者：許福合
攝影：陳陶鈞
Model：Algie@PureModels
配前後級放大器
講得發燒音響，當然唔係隨便拎兩隻喇叭仔出到聲就算，今日要針對係對音色有發燒要求的玩家！今日仲係聽CD年代，所以最基本配置有CD機，擴音機同2聲道喇叭；我哋今日就搵咗法國YBA做一個配搭，而擴音機方面，就會用前置及後級放大器，這個玩法會比較高檔，入門級可選擇合併式放大器，預算亦會較經濟。首先，放置CD機及擴音機嘅機架，最好有減震能力，若有使用前後級放大器，最好將後級放在最底，事關後級通常係最重，而且機頂最好預留1-2吋空間散熱。
屋細喇叭大有回音
2聲道音響在接駁上相對較簡單，只要將信號線跟番指示接上即可，謹記不要將左右聲道搞錯；設置時最着重喇叭選擇及位置；選購喇叭時，切記要因應家居環境，選擇合適喇叭，太細自然聽落唔夠力，但太強勁的喇叭在無足夠空間情況下，亦會造成回音太大、影響音樂感。
接駁喇叭時要留意別搞錯喇叭線嘅正負頭，否則聽出來聲音就會怪怪的！喇叭位置最好與皇帝位形成等邊三角；不過，想調校出自己口味，最好仲係搵隻熟悉CD細聽，一邊聽一邊可小距離地前後移動喇叭，搵出一個最小共振位，聽落好似真係有人在你面前演奏一樣，咁就最Perfect！
高級組合精選
GC10CD機
YBAGC10CD播放機，可以讀取CD、CD-R及CD-RW，訊噪比為107db，並且有24bits/192kHz數碼模擬轉換。
GP20前置放大器
前置揀這款GP20，有6組RCA及1組XLR輸入，輸入信號增益為+12dB。
GA20後級放大器
後級用YBAGA20，功率輸出可達440W（4ohm），玩單層鋁框架，外觀相當有質感。
Morel喇叭
這對OctaveSignatureFloorstanding喇叭，單元設計與DigitalAudio相似，低音音箱可分體放置，清晰得來低音不濛，火紅色機身十分搶眼。
發燒要注意
預留空間
喇叭設置相當考究，與牆壁要有足夠空間，否則會容易造成回音，影響音效。
熟悉CD試聽
唔使成日試機天碟，有時一隻自己熟悉的CD，對找出立體感強、低音清而不濛的最佳位會更易。
平衡信號線
發燒玩家多選平衡線，相比於一般RCA線，優點係增益大、噪音低，更易滿足發燒友要求。
左右要分清
接駁信號線時，定要注意左右聲道插頭，不可掉轉插，若使用RCA線只要依顏色接駁即可。
唔想嘈親人 耳機配耳擴
有時唔想騷擾家人，但又想聽歌？使用耳機當然係一個好選擇，不過唔想對唔住自己隻耳，除咗要為佢預備靚耳機外，更要預備埋耳擴，聽落先夠力水，否則不如聽iPod算！
查詢：華仁影音（27877993）