近排好多人轉軚，解釋得冠冕堂皇，理由可能只得一個：適者生存。不過身邊仍有人企硬，佢哋可以話係史前動物，幾乎絕種。堅挺嘅友人呢期有嘢啱你地睇，就係恐龍展，大家都係絕種生物。
德福廣場會搞「勇闖侏羅紀」恐龍展覽，合作嘅係世界三大恐龍遺址博物館嘅四川自貢恐龍博物館，美國《全球地理雜誌》曾經評佢係「全球最佳恐龍博物館」，博物館安排緊五具從未喺香港曝光嘅侏羅紀時期恐龍骨架化石展出，包括21呎、成兩層樓高，身長56呎嘅龐然大物「楊氏馬門溪龍」，同埋目前世界上已發現最完整兼體積最細嘅鳥腳類恐龍「勞氏靈龍」。
馬門溪龍兩層樓咁高
德福似乎唔係好知啲恐龍嘅資料，但小妹查過，馬門溪龍生活喺侏羅紀晚期起，約1.6億到1.45億年前，廣泛分佈喺東亞地區。馬門溪龍嘅身體可以長達72到85呎，而頸佔一半長度，係曾經生活喺地球上嘅最長頸動物。
靈龍生活喺侏羅紀中期，個名嚟自拉丁文「靈敏」嘅意思，因為骨骼輕盈同長腳而命名。佢係極快嘅雙足奔跑動物，亦係細型嘅草食性恐龍。展覽7月17日開始舉行，隨緣樂助捐款畀聯合國兒童基金會就可以入場。
電郵：mailto:[email protected]