驚現排骨撐燈光影響Sammi:全港知我心口冇肉

驚現排骨撐燈光影響
Sammi:全港知我心口冇肉

鄭秀文(Sammi)昨日在尖沙嘴出席無國界醫生活動,她捐錢之餘更希望參與探訪活動。許志安早前公開表示心痛Sammi暴瘦,要她增肥,Sammi對此笑說:「全香港人都知我心口零舍冇肉o架啦。」

鄭秀文昨日以榮譽行動大使身份,出席在尖沙嘴舉行的無國界醫生活動,之前Sammi推出的福音大碟版稅已達7位數字,將分成兩份捐出,加上她為周刊寫稿的稿費,合共捐出過百萬元予無國界醫生。
Sammi說:「另一半會捐去兒童癌病基金,都希望遲啲可以跟無國界醫生去探訪,照顧吓啲病人同傳福音。」

愛心爆棚的鄭秀文為無國界醫生宣傳外,又捐過百萬善款,出錢出力。

Sammi日前在台灣開騷,瘦得我見猶憐。資料圖片

「102磅好健康」

Sammi剛完成台灣演唱會,見她骨瘦如柴,心口的排骨清楚可見,安仔更心痛地形容為糖醋排骨,公開要求她食多啲增肥,對於安仔的心痛,Sammi只笑笑說:「唔講呢啲呀,呢個話題唔講。」被指瘦得體重只得95磅,Sammi強調:「我邊有試過90幾磅,點都有100零幾,家大概102磅,身體好健康,可能係啲燈光影響先有張咁嘅相,同埋全港700幾萬人都知我心口零舍冇肉o架啦。」
此外,Sammi與寇鴻萍私交甚篤,寇鴻萍夫梁廷鏘捲入迷姦案,不知她有否慰問對方?Sammi坦言:「我有同阿寇聯絡,阿寇喺呢件事上好堅強,佢都好煩o架啦,作為朋友會精神上支持佢,我比較擔心佢兩個女多啲。」

讚梁廷鏘有禮

Sammi表示相信寇鴻萍會懂得處理,她說:「希望一切快啲水落石出。」對於梁廷鏘為人是否很熱情,Sammi說:「見過佢兩、三次,覺得佢好禮貌彬彬,唔覺好熱情、搭人膊頭呢啲舉止。」採訪:胡比
攝影:陳志嵐