前恒生大班柯清輝（圖）舊年退休，年底即過檔中策集團（235），仲搵埋前政府高官馬時亨入局，走去收購AIG喺台灣嘅南山人壽業務，諗住人到中年再創一番事業。點知人離鄉賤，台灣佬唔賣賬，仲要俾人發現佢係全國政協，搞到收購一波三折。
為咗收購成功，柯大俠連全國政協委員都辭埋；但係台灣金管會等政府機關，對佢之前隱瞞心有不滿，台北市政府已經去信撤銷佢同吳榮輝、邱永耀、許銳暉4個人喺博智南山嘅董事登記，令收購再添波折。
收購限期延長咗3個月、同中方嘅關係喺台灣又唔討好、台灣行政院副院長陳沖仲話，關注南山人壽新經營團隊夠唔夠專業。陳沖話，大股東係投資人，但股東冇可能乜都識，政府好在意經營團隊，新投資者都要有清楚嘅businessplan（經營計劃）。言下之意，即係暗示柯大俠同佢嘅團隊，收購之路唔易行。
家咁多變數，用政協委員身份換收購機會，真係唔知抵唔抵！
李華華