民協馮檢基兩年前喺屋企唔小心跣低跌傷，右邊膊頭至今未完全康復變成舊患，點知真正禍不單行，噚晚又喺同一個位跣多鑊，噚日去立法會開會前要照X光，會後趕去睇跌打。
基哥講意外地點喺屋企一條通往騎樓嘅樓梯，級數只有兩級咁大把，但已足以跣到佢成個趴地，搞到前晚要一邊忍痛一邊捱夜睇世界盃。
社民連黃毓民噚日亦話早排唔小心喺街跌親，慶幸無大礙，近排忙睇世盃之餘，亦花時間為嚟緊兩場棟篤寸做準備，收益會捐作社民連黨校經費。據毓民講，早排佢寸白鴿黨嗰句「胡錦濤，好大呀！」，已成為唔少fans電話鈴聲，嚟緊書展佢有兩本新作面世。