由資深記者轉型公關大員，到協助煲呔競選特首打響名堂嘅PR界名人游淑儀，終於蒲頭，加盟美資公關公司安可顧問（APCO），出任高級副總裁；伊人今日仲會正式以新職銜，亮相合和公路（737）喺香港首次發行人民幣債券嘅慶祝酒會。游小姐啱啱返工一個星期，已經成功令合和呢個舊客蟬過安可別枝。
原任哲基傑訊公關聯席董事總經理嘅游小姐，自6月中離職之後，一時傳佢加盟金管局，一時又傳佢自行開舖打江山，最終原來轉投安可顧問。呢間寶號，客路以公共事務為主，財經上市就唔及哲基，睇嚟呢次禮聘伊人係想拓展金融公關呢一瓣。
李華華