今年世界盃花落誰家，好快有分曉；渣打銀行喺6月初世界盃仲未開鑼之前，就做咗一份好另類嘅戰情分析，由經濟金融角度預測呢屆嘅皇者，竟然又俾佢哋貼中咗今屆打入四強嘅大熱門德國同西班牙!
渣打以國家嘅信貸違約風險掉期合約（CDS）嚟做量度指數，結果德國嘅CDS指數最低，只有42，所以就被貼為世界盃大熱；佢哋又用世界盃以往歷史數據加風險分析，結果推斷出西班牙係大熱。渣打香港經濟師黃國璋笑話，如果大家一早留意佢哋嘅報告，家已經贏唔少!
另外，渣打以實質有效滙率嚟做評估因素，結果得出德國、英格蘭同阿根廷嘅滙率最被低估，亦被貼為世界盃大熱，但其中兩隊已經出咗局！
李華華