香港幾間大學最近陸續喺內地招兵買馬，挑選祖國精英子弟。大學甄選內地學生，除咗睇成績亦要面試。香港大學近期喺廣州招生，面試題目就喺網上流出。根據內地一位傳媒人嘅網誌形容，港大嘅面試題目好貼近現實。
錄取率3.3%
港大面試題目包括：「人說世界盃就像一場戰爭，你怎麼看？」、「你如何看待富士康自殺事件？」、「你怎麼評價最低工資制？」嘩，聽落真係好有親切感喎，十足十八方做新聞採訪嘅熱門話題。據講，今年香港各大學共收到內地逾9,000學生入學申請，其中5,000人獲面試，最終取錄300人，只有3.3%嘅錄取率。
內地傳媒人劉晶瑤大讚本港大學嘅面試題目，來自社會生活各個層面，基於培養一個完整嘅人而設，靠死讀書、讀死書係考不好嘅。劉晶瑤叫國民反思內地教育嘅人才培養機制，有冇引導學子腳踏實地。
不過有內地網民認為，從港大面試題目可以睇得出，香港嘅學府係「就業服務站」。意思係，題目太過務實，唔講理論。八方覺得，其實面試問乜都冇所謂，答案先重要。好似林瑞麟呢類人才咁，你問佢乜嘅答案都一樣，應考學子有樣學樣嘅話，就係各大學府之福。