盧溝橋事變73周年，保釣行動委員會噚日7.7去中環日本領事館抗議，起錨前在中環郵政總局外集合，等齊人先出發，其中一名示威者「女長毛」雷玉蓮準時到，百無聊賴之際，竟然發現咗一個異象。
蓮姐同八方講，佢到場後見到其中一架在場戒備警車，覺得好特別，因為該警車個車牌，赫然就係AM8964。蓮姐係性情中人，全年無休毋忘六四，所以一睇到呢個「生命密碼」，即時覺得好激動，「原來香港政府都毋忘六四。」
7月11日拍賣8964車牌
蓮姐問在場警員，知唔知道呢個車牌有乜特別，點知幾個警員都擰晒頭，蓮姐話番畀佢哋知：係八九六四呀！眾人先如夢初醒如當頭棒喝。蓮姐唔理得咁多，情商同行戰友幫佢影番張相留念，「可能曾蔭權都估唔到，有架警車毋忘八九六四」。
講開八九六四車牌，嚟緊星期日7月11號，運輸署會拍賣一個無字頭8964車牌，行內人估計呢個政治性車牌底價要十幾萬元，成交價隨時要20萬元，亦有人指因為政治敏感，未必太值錢。車牌花落誰家暫時不得而知，有支聯會常委稱，雖然冇正式討論過應否舉手競投呢個車牌，但由於支聯會冇車，就算買到呢個咁有意思嘅車牌返嚟亦得物無所用，所以傾向唔出手。
無字頭8964車牌由乜嘢人勾出嚟拍賣？至今仍然係一個謎，有人笑言，不妨由社民連主席陶君行出手買入，再轉送支聯會，以平息近日佢同支聯會、華叔互罵風波。華叔寫咗篇題為《陶君行可恥！》嘅文喺《明報》刊登，火氣甚猛，更表示對陶君行「睇住你大，睇住你壞」。
陶君行誣衊支聯會被轟
呢次風波，緣於陶君行質疑支聯會喺5.30遊行時收起「結束一黨專政」示威牌，以配合民主黨同北京溝通政改，因此惹來華叔高分貝駁斥。十幾個海外民運團體，噚日亦聯合發出聲明，批評陶君行誣衊支聯會，破壞爭取民主人士團體，破壞爭取民主大業，要求佢道歉兼承擔責任。有支聯會常委稱，月底開會未必要踢陶君行出會，因為常委年年改選，「既然道不同，相信佢今年都唔會再參選」。
mailto:[email protected]