7.1回歸獲頒授大紫荊勳章嘅賭王何鴻燊，舊年唔小心跌傷頭，手術後留醫好長日子，今年賭王終於出院，返回大宅休養。噚日忽然又傳出賭王又入咗養和醫院消息，八方噚晚搵到身在澳門嘅四太梁安琪，佢證實賭王入院消息，不過就話唔使擔心，「冇事，入去例行檢查啫。」至於賭王幾時出院，四太就冇透露，「總之冇乜事啦。」
賭王今年初出院後，據稱復康情況理想，可以行花園、同親友傾偈兼做運動，上個月父親節，賭王仲同二房啲家眷去咗深水灣鄉村俱樂部食飯慶祝。賭王除咗有香港大紫荊，又有澳門大蓮花，佢早前稱對受勳感到好榮幸，會堅守回饋社會承諾。