收銀妹：老闆，你又話今屆係世界盃，但點解打到尾聲，又好似變番歐國盃咁嘅，今晚德國對西班牙，咪又係兩年前決賽翻版？
李老闆：o靚妹，好記性喎！原本8強有4支南美兵，點知輸吓又一隊，輸吓又一隊，巴西同阿根廷先後出局，先坐大歐洲幫啫！
外賣仔：收銀妹，其實歐洲球隊一向都喺世界盃有優勢，上屆4強全部係歐洲幫㖭！德國4強先輸畀意大利。廚房佬，你睇咗幾十年波，德國對西班牙，又點睇呀？
廚房佬：雖然兩隊都算係歐洲一線球隊，不過講落又冇咩大仇口；德國之前淘汰咗英格蘭同阿根廷，佢哋就有深仇大恨，又睇吓兩年前嘅仇，德國報唔報到？
經紀陳：計我話，講番咸豐年前嘅嘢，又有咩關係！好似86年阿根廷贏西德嗰陣，而家德國呢班牛奶嘴都未出世啦！講國仇，又點及得自己光明前途咁緊要。
李老闆：咁又係呀，德國今次用班o靚仔，速度快過啲國產車波子呀，賓士呀！相反，西班牙係就係粒粒皆星，但個個上晒位，個個都好錫身。戰神，你都中咗德國幾口錢，仲追唔追落去？
戰神：問嚟都多餘，梗係繼續追德國啦！論氣勢論攻力，德國點都好過西班牙，我唔信佢哋會突然跌watt，揀德國晉級呢個1.9倍，可玩到尾㖭！