我哋祖國地大物博，如果你諗到一條橋，再將佢發揚光大，賺到十幾億人口嘅錢，你隨時變做億萬富豪都唔出奇！最近就有人諗到，幫人哋查手機通訊紀錄，原來都可以成為一個產業鏈，最緊要係唔休無人幫襯！起碼有兩類人會畀生意你做，一類係處理家庭內部矛盾嘅人，另一類，就係同商業競爭對手嘅問題。
喂，咁即係咩生意先？如果你老公發咗達，你作為老婆，驚唔驚佢包小蜜（即係港人話嘅包二奶）？你有冇試過check住佢嘅通話紀錄，睇吓佢有冇對你唔住？甚至乎……做生意嘅各位老闆，想查吓合作夥伴或者競爭對手呢排嘅動向，有咩好計仔？
廣州有間公司話，只要你畀個廣州手機號碼佢，佢就可以幫你大起底，將嗰個號碼半年以內任何一個月嘅紀錄，喺一日之內就搵到畀你，每個月嘅紀錄，都只係收500蚊人民幣咋……你話係咪賺到笑呢？
李華華