跨媒體文化人梁文道寫咗篇題為《香港政改再思考》嘅文章，上星期在內地刊物《時代周報》刊出，批評政改方案保留立法會功能組別，甚至將功能組別合理化，簡明介紹立法會「古怪又不平等」嘅制度。
向fans報平安
梁文道又指香港有此畸形政制，同意大利墨索里尼、西班牙佛朗哥相似，直指呢種係「深受法西斯獨裁政權與殖民帝國歡迎的制度」，因為統治者只要籠絡幾千個甚至幾百個有財有勢嘅人，就可以名正言順「官商勾結、精英共治」。
批評雖然尖銳，但喺香港唔算罕見，之不過文章出現在內地刊物，部份讀者睇完覺得好敏感，噚日有網民流傳梁文道可能因此惹禍，被封殺不能主持喺內地播出嘅節目，其他寫文章地盤都可以不保！八方向梁文道求證，佢話上述文章出街後，唔覺有異樣，如常出入內地，噚日繼續主持鳳凰衛視個節目，亦有到深圳為騰訊講世界盃，佢估計係有部份網民擔心佢被封殺，實際上佢冇事，向fans報平安。