嫁到日本，至今仍一百萬個唔願做嘅，就係要我跪，唔係怕腳痹嘅感覺，而係跪呢個動作，對腳形之壞影響，唉，你睇o架妹十個有八個係O字腳就知道，幾醜！而我當然唔係怕自己一對42吋美腿會變形，我怕嘅係一對寶貝仔女，因為奶奶自小就教佢哋跪，睇到就眼火爆，但又唔想當面駁斥，我更加唔會喺妲那面前投訴，畢竟呢個係佢哋嘅文化，嫁得過去就要尊重。我唯一可以做，就係晚晚睡前同對仔女做按摩，甚至做yoga，呢個係我私底下請教一位日本足科醫生嘅方法，佢話每日做幾分鐘，小朋友對腳仔唔會變O字腳外，更可預防扁平足，細細聲話你知，多做，小朋友仲會易高啲！
即刻睇：
按摩抗O字腳
小朋友3歲前小腿都會有少少O字形，呢個好自然，不過唔想O字腳延續至長大成人，晚晚花兩分鐘做腳仔按摩啦。
先叫小朋友坐好，可坐喺沙發上又或床仔上，然後捉住其中一隻腳嘅小腿，一定要全隻手捉實，你另一隻手就捉實小朋友嘅腳板仔，然後輕輕向外拗就得啦！
扮蝴蝶長高啲
想小朋友長高啲行好啲，盆骨鬆緊有直接影響，以下呢個動作有助鬆弛小朋友盆骨，動作又似蝴蝶咁，小朋友會好鍾意！
先坐下，叫小朋友腳板對腳板，然後如蝴蝶上下拍打雙腿，每次十下就夠！
再醒你啦，小朋友瞓覺時唔好反轉趴響床，咁瞓都會影響腳部發育o架！
OKAWASAN，本姓陳，8年前下嫁日本salaryman，是仔女口中的全能mama，也是妲那（即老公）眼中的完美人妻……