前日花旗股市休息，港股噚日喺A股帶動下造好，尾段升勢凌厲，恒指企喺全日高位20084收市，上升241點，光頭陽燭兼破腳穿頭，技術走勢好靚，不過成交仲係好奀，只得465億，今日可唔可以繼續升都唔敢講得太實。
較為利好嘅係A股喺低位反彈，今日有機會繼續炒上，但花旗股市放假前嘅走勢都係麻麻，噚晚可唔可以擺脫弱勢，仲有疑問，如果上升收市，恒指可試20300。
財險C輪18000：中國財險（2328）噚日報收7.68元，升4.6%。以升幅計唔算最強，但睇埋成交同走勢，就會知佢有料到，必有後着，噚日大成交破10日線，應該好快試6月高位8.24元，破埋就試4月高位8.62元，可以諗吓隻C輪18000。
隻輪現價10仙，2010年12月30日到期，行使價8.09元，溢價18.4%，引伸波幅54%，有效槓桿率4倍，正股見8.62元，18000睇18.5仙，正股跌穿7.24元就沽咗隻輪。
俊樺