建制派喺政改大戰中被煲呔賣豬仔，最後關頭先知煲呔同民主黨傾掂數，被迫硬啃方案，難怪開到聲話政府「有事鍾無艷，無事夏迎春」。煲呔知衰，呢期四出宴請建制派食飯消氣，噚晚先拉晒成個問責班子去賀民建聯18歲大壽，打破過往慣例，主動要求致辭，勁擦民建聯鞋，之後就返禮賓府宴請工聯會一班火氣十足嘅領導，煲呔自稱鍾意擦鞋嚟減壓，越擦越起勁，肯定壓力全消。
賀民建聯 主動致辭
煲呔噚日去到民建聯黨慶場地時，夾道歡迎嘅除咗有民建聯領導，仲有專程嚟「賀」民建聯嘅兩名示威者。面對現場十幾個警員兼保安，示威者完全埋唔到煲呔身，只可以離遠高叫「爭取2012年雙普選」同「廢除功能組別」，最後仲被大會堂職員「趕」走。好彩佢哋期間成功遠距離寸爆鬍鬚曾「多謝你咁大聲」，被寸嘅鬍鬚曾則以手扮聽嘢狀，唔通係嫌示威者仲唔夠大聲？
司長同各問責局長噚晚幾乎空群而出，反映特區政府幾咁重視民建聯慶生會。身為主禮嘉賓嘅煲呔破天荒主動要求致辭，唔係講行貨，有的放矢話建制派大呻冇份參與政改獨木舟唔係事實，講到明話如果唔係民建聯同其他黨派肯合作，都唔可以乘風破浪起錨，明讚民建聯肯為大局犧牲。
煲呔繼而大談成熟同專業政黨嘅四大條件，包括反映民意、紮實研究、擅於政治溝通同埋重視人才培訓，講到尾都係讚民建聯專業同成熟，多年嚟同政府建立良好夥伴關係，尤其係喺香港整體利益關鍵時刻肯畀政府有力支援，唔係講緊政改又係講緊咩？
冰釋前嫌 互笠高帽
難得被煲呔擦鞋，民建聯主席譚耀宗冰釋前嫌話會協助「曾舵手」乘風破浪，現場唔少人聽到毛管戙。民主黨副主席卿姐噚日都唔避嫌，現身酒會social。佢話去年都有同主席何俊仁結伴而嚟，仁哥今年唔得閒，佢惟有單拖上陣，強調呢類政黨社交活動幾乎逢請必到。問佢驚唔驚又招人口實？佢話自己百無禁忌喎。
mailto:[email protected]