「我係變咗！」喺政改一役，企硬十幾年嘅民主黨副主席劉慧卿都認自己有變。但正如志雲大師所講，試問有邊個人嘅生活係從來未遇過任何變化？卿姐由瞓街卿變咗做揮手卿，6.23政改表決日走咗去同左派群眾熱情揮手，的確令唔少人震驚。不過揮手卿好快就投入角色，噚日喺立法會停車場同一地點，再次好熱情咁向百多位請願消防員揮手講話。
揮手卿劈頭就話「我劉慧卿乜人都唔怕，邊個都照揮手！」跟住講咗一輪支持工會爭取權益之類嘅說話，臨行前又再回眸向消防員輕輕揮手。
面對唔同層面嘅群眾都揮灑自如，與卿姐同行嘅張文光似乎難以望其項背，只係同消防大佬握手。