世界盃四強大戰明日凌晨才展開，無綫已先與有線開火。無綫昨日決定在有線提供的世界盃聲音訊號中，加插一條自家製講波頻道。儘管昨日有線揚言無綫若違規會即時中止訊號，但無綫冇有怕，強調加多一條頻道無非是加強對觀眾的服務，一場電視台大戰一觸即發。
無綫高清翡翠台和亞視高清亞洲台，將於明日凌晨直播烏拉圭對荷蘭、後日凌晨德國對西班牙的兩場準決賽，及下周一凌晨舉行的世界盃決賽，訊號由有線一台提供，兩台須播出有線講波畫面、廣告及評述員聲音等。
但無綫昨日開會後，決定在有線提供的聲音訊號中加插一條無綫自家製頻道，由身在南非的馬啟仁聯同香港的鍾志光、張國強和李偉文等一起講波，即觀眾除可收聽有線提供的英語和廣東話聲音外，還可選擇無綫講波訊號。
「畀多個訊號觀眾選擇」
對於無綫決定，有線態度強硬，有線世界盃籌委會經理曾展章昨在電話說：「佢哋加同減都唔可以，要全部播放我哋提供嘅嘢，由頭到尾原汁原味播我哋嘅節目同廣告，有任何偏離都係違反合約。如果佢哋偏離咗，即係毀約，我哋都冇辦法，咪掹佢signal（訊號）囉，觀眾可以睇ATV（亞視）。唔使做埋古古怪怪嘅嘢。」
雖然有線揚言若無綫違約便掹線，但無綫冇有怕，在經過法律部門研究過合約細節後作出決定。外事部副總監曾醒明昨在電話說：「我哋完全遵守合約原汁原味播出有線一台訊號，滿足有線同我哋嘅協議，我哋只係強化對觀眾嘅服務，畀多個聲音訊號觀眾選擇。」有線揚言「掹線」，曾醒明說：「Cable（有線）提供嘅聲音訊號完全唔受影響，我哋係以球迷為依歸啫。大家都係負責任機構，如果佢哋做呢一步（掹線），公眾自有判斷誰是誰非。正如佢哋請人食鹹魚雞粒飯，我哋煎多嚿鹹魚畀大家，咁對原本碟飯冇影響o架。」
採訪：林妃