前日有40幾人喺大熱天時下遊行反社民連，雖然人人都聲稱自發參加，但有人發現當中有民建聯黨員，其中一個更係在五區公投中出選新東，挑戰長毛嘅陳國強，呢班人是否真係烏合之眾，似乎唔使多講。
民主動力籌款減半
區區幾十人示威，社民連自然不放在眼內，長毛噚日更學林瑞麟咁「贏到盡仲要抽水」，反寸遊行人士，「50人真係好犀利喎，我哋社民連真係好驚喎！」又話初時仲以為有50萬人上街反社民連，聲言如果有50萬人上街，佢即刻買飛機票走人離開香港。
社民連7.1遊行籌款多過公民黨、民主黨，難怪長毛咁得戚，終極普選聯盟成員團體民主動力，今年遊行籌款數字減一半，由去年30,000蚊跌到15,000元，當日為民主動力企街站嘅蔡耀昌話，籌款銳減係意料中事，因為好多人唔認同普選聯嘅溫和路線。