西九「鼠王芬」以對付老鼠響朵，近日各區鼠蹤處處，佢立即出動派發《滅鼠天書》，點知落到區卻遇上真正「鼠王」。鼠王芬噚日去深水埗北河街、寶安道同紅磡街市派天書，一身檸檬黃色打扮，行街市好搶眼，可能怕老鼠咬腳，佢對高踭鞋露踭不露趾。鼠王芬第一站去上星期有清潔工被老鼠咬傷嘅北河街街市，部份販商反應一般。
喺呢個街市賣魚嘅港九鮮魚行總會理事長黃天雄就話，街市有老鼠好平常，又話捉老鼠講經驗，唔係紙上談兵，似在暗寸鼠王芬。黃老闆透露獨門捉鼠秘訣，就係放嚿魚膶入老鼠籠，老鼠也愛腥，所以十拿九穩，所謂天書介紹嘅捉鼠方法，要用唔同道具裝陷阱，有冇效呢？唔知嘞。